Güenu, oi, compairis, vos envitu a leyel una e las novelas que mas m’án emocinau enos úrtimus añus; endi Pedro Páramo, e Juan Rulfo, nu me iba entrau tantu ena estória dun libru. Estoi palrandu al tentu El Prehumi, e Patrick Süskind.
En poquinas parabras la narración mos muestra la via, labutacionis i miragrus (paeci un tópicu, peru rialmenti aconteci asina) dun espenau zagal, hucheau Jean-Baptiste Grenouille, ena Fráncia del sigru XVIII. Esti niñu ubu nacéncia e la horma mas ehraciá que mos puamus imahinal: la su mairi ententa matalu namás nacel, peru l’aparan i esi pilongu enceta a envelnecel entri famílias d’acohias, hata que toas lo ehan. I es qu’el zagal tié un pobrema: el su golol. Peru el chascu nu es que tenga cherazu, sinu que nu güeli a ná i esu paeci que da grima a tol mundu. Lo que naidi barrunta, namás que él, es que puei golel cualisquiel cosina endi abondu longol i crasifical los goloris itó, recuerdándusi e tós pa siempri.
Poquinu a poquinu el niñu esmiença a landeal labutu i l’alcuentra, cumu nu, nel grémiu los prehumistas, cumu oficial del más conociu de París. Endispués deprendel las ténicas del trebahu, decii landeal el prehumi mas prefetu, la basi pa tós los demás. I se l’apaici ena fegura duna adolecenti. La mata i la gaha el su golol. Endi esti inti, escomencípia una lihera carrera pa aconsiguil cuantis mas goloris de niñas mehol. El acaberu mehol nu te lo cuentu, pa nu çalealti l’estória, peru tapocu te ehará endeferenti.
Lo mehol desta labutación nu está nel ergumentu, que puerie sel el de cualisquiá novela d’entriga, sinu enas descricionis de los goloris, ena entrospeción siculóhica e los presonahis i ena irónica comparáncia de la via de Cristu cola el protagonista.
Al respetivi los goloris, el autol cria un mundu nuevu nel que los simpris mortalis nu arreparamus: el mundu e los airomas. I encima encuaira l’ación en París, una e las ciais mas heyondas de l’epoca. Nesta balburda de goloris, los de las froris i los cherazus, Grenouille los destingui dun mó analíticu i centíficu. Asina, el letol puei goçal dun estilu ricu en sinestésias, metáforas fativas i descricionis rialmenti repulias.
Al tentu los presonahis, ai que hazel alabáncias al escrebiol alemán pola su pacéncia pa entroucil el caraiti i los rahus, sobritó del protagonista. Está craru que pal autol nu son una escusa namás pa tupil l’estória con paha (ya estoi hartu e que los escrebioris de best sellers mos tratin a los letoris cumu burrinus ehalamius de paha), sinu qu’es una parti mu emportanti pal acaberu.
Peru lo que sin dua anguna m’á sorprendiu á siu las analohias cola via de Cristu. Cumu esti, el protagonista ubu nacéncia ena mas mísiri probécia, vaiga el retundieru; se hue al estierru voluntáriu (el disiertu nel chascu e Hesús, al monti el «güenu e Grenouille»); i p’acabihal, argu relacionau con una crus i la muerti…
En difinitiva, que te recomiendu esta novela, polque ogañu, leyel un best-seller i con caliá literária itó, nu es argu normal.
Si eris estremeñu, palra estremeñu 