Noveais nel blog

Salús a tós. É chambau el espeutu el mi blog, sobritó polqui esta nueva piel me eha confegural mas cosinas. Las noveais son la posibiliá de puel vel vídius ena parti derecha e la páhina i tamién é criau un atahinu pa que vos puais bahal el Izionáriu i L’Ortugrafia escrebius pol Ismael Carmona. Los archivus están aposentaus ena páhina apañera muestra EstremaWeb. El primel vídiu que é puestu es sobri Caçris qu’estaba en Youtube. Asperu que vos paeça puliu cumu a mí.

Los chinus envadin Estremaura.

Enos úrtimus tiempus estamus a vivil una verdaera pelegrinación del puebru chinu a tierras estremeña. El chascu nu es descrusivu e la muestra rehión namás, sinu tamién del restu el país. Chegan a una ciá, de plonto tién un local pa cuaharingal angún comélciu i nu dan ni chispa e pobremas. Estas impresas audechan a sel risturantis de papáncia china, comélcius de raferias, çocus de baratuelas i estalachis várius i algotrus de cosinas más pulias, talis cumu hatus, çapatus u relocis.

Yo, vos vi a palral al tentu los que áin en Don Benitu, ondi vivu. Aquina abian al prencípiu risturantis namás, peru col tiempu, huerun chegandu los çocus, i inque la caliá de los cachaparrus que puias mercal nu era la mas pulia, enverá eran mas baratus i esmerecian el arriscu. Endispués, apaició la competéncia e los morus i los chinus tuvun que landeal cosinas más artas.

I asina hue. Ara cuaharingan grandis superficis i mos vendis de tó. Son mu arrecomendabris, el Euro Don Benito i el çocu que está enfrenti. Peru el que están a abril ena verea Don Benito – Villanueva paeci que sedrá el difinitivu… inque con estus chinus, cualisquiá sabi.

Bienvenius al mi blog.

Endispués de muchas ententonas pa hazel un blog al tentu la curtura i las hentis estremeñas i alú algotrus pa muestral traucionis a esta la muestra palra, pofín vi a crial una mesturança entri ellus.

Los prehentis artículus, namás que quierin sel unus papelis pa que to los estremeñus puean leyel de las sus cosinas, enteracionis i bichus ena su própia palra. Tamién es capás de bel cosinas gramaticalis i encrusu tengu nel caezu crial un cursinu simpri pa encetal a deprendel esta palra tan pulia.

 Sin más vos envitu a pasal a esta mihina e la muestra tierra.